Water en Energiebedrijf Bonaire (WEB) a informá públiko ku entrega di awa di bebe via trùk di awa ta eksperensiando un interupshon temporal debí na problemanan tékniko i logístiko. E situashon akí a kousa retraso pa klientenan ku ta dependé di e tipo di suministro aki.

Segun WEB, e problema prinsipal ta relashoná ku tardansa den entrega di piesanan esensial pa drechá e trùknan di awa. Komo resultado, no ta tur trùk ta operashonal na e momento aki, loke ta limitá e kapasidat di distribushon rònt Boneiru

Aktualmente, WEB ta konta ku solamente un trùk di awa operashonal ku un kapasidat di 8.000 liter. Esaki ta nifiká ku e tempu di entrega ta mas largu ku normal, i ku algun kliente por eksperensiá retraso di mas dia ku lo kustumbrá.

Durante di e limitashonnan, tim di WEB ta sigui traha intensamente pa mantené servisionan na un nivel aseptabel i pa minimalisá e molèster pa komunidat. Pa garantisá kontinuidat, empleadonan lo sigui traha durante dianan di fiesta, pa logra atendé tur kliente ku ta dependé di entrega via trùk.

WEB a indiká ku nan ta spera di risibí un trùk di awa nobo pa fin di luna, miéntras ku e otro trùknan eksistente lo ta kompletamente drechá tambe. Ku esaki, e kompania ta spera di fortalese su kapasidat i respondé mihó na e demanda kresiente pa awa via trùk.

WEB a ofresé su diskulpa pa kualke inkumbiniensia ku e situashon por a kousa, i a sigurá komunidat ku e tema tin nan atenshon kompleto miéntras nan ta traha pa resolvé e problema lo mas pronto posibel.

Advertisement