Personanan ku ke usa reda den awanan di Boneiru mester tin un sertifikashon bálido di STINAPA. E medida aki ta forma parti di maneho i protekshon di rekursonan marítimo den Bonaire National Marine Park.

Na Boneiru tin solamente 4 reda n’e momentunan aki ku sertifikashon. Pa haña sertifikashon, un persona mester tin un sédula di Boneiru i a biba na Boneiru pa mas ku seis luna konsekutivo. Kada reda mester wòrdu registrá separadamente, i e grandura di e wowonan di e reda mester ta entre 1 i 2 sèntimeter. E reda por keda 10 dia den awa, despues di esaki por risibí un prolongashon di 48 ora. Ningun reda lo por keda mas ku 13 dia den awa.

Den e reglanan, ta stipulá ku no por tira reda den zonanan kaminda ta prohibí pa piska ni dilanti di akomodashonnan turístiko. Promé ku pone un reda den awa, e doño mester informá STINAPA kaminda e reda lo wòrdu instalá.

Doñonan di reda tin responsabilidat kompletu pa mantené kòntròl i vigilansia riba nan reda 24 ora pa dia. Ademas, mester kontrolá e reda kada 2 pa 3 ora dor di landa rondó di dje pa prevení ku espesienan protehá ta keda pegá aden.

STINAPA tin e outoridat pa hasi kòntròl na kualke momento. Si e organisashon konstatá ku e reglanan no ta wòrdu siguí, e sertifikashon por wòrdu anulá inmediatamente.

Ku e sistema di sertifikashon aki, STINAPA ta buska pa garantisá uso responsabel di redanan i protehá e eko sistema maritimo úniko di Boneiru.

Advertisement