Den e wikènt ku a pasa, Kuerpo Polisial  Hulandes Karibense (KPCN) a detené seis shofùr pa manehá bou di influensia di alkohòl durante kontrolnan di tráfiko na diferente lugá.

Segun KPCN, e kòntròlnan a tuma lugá for di djabièrnè 29 di mei te ku djaluna 1 di yüni, den kual varios kaso a ser detektá kaminda shofùr tabata manehá ku un nivel di alkohòl mas haltu ku ta pèrmití pa lei.

Djaluna 1 di yüni, alrededor di 3 or di mardugá, a detené un hòmber di inisial C.A.C.R. di 44 aña di edat den ‘Centrumgebied’. E sospechoso a bèk ku su vehíkulo i dal den un outo di polis. Konforme e maneho di ‘botsen is blazen’, a hasi tèst di supla ku ámbos shofùr i a resultá ku e sospechoso a konsumí mas alkohòl ku ta permití pa lei. El a haña prohibishon di manehá pa 7 ora.

Djaluna 1 di yüni, alrededor di 2.20 or di mardugá, a detené un hòmber di inisial M.A.V.S. di 41 aña di edat na Hanchi Amboina. Detenshon di e sospechoso a tuma lugá despues ku un patruya a mira un vehíkulo stashoná ku porta habrí riba e kaya menshoná. E shofùr tabata na soño i e agentenan a disidí pa lant’é. Aki a konstatá ku e tabata mustra diferente karakterístika di un persona ku ta bou di influensia di alkohòl. Pa motibu ku e agentenan no a mir’é manehá e vehíkulo, a dun’é un prohibishon di manehá por eskrito. Na momentu ku e patruya a bandoná e sitio, e sospechoso tambe a bandoná e sitio den e vehíkulo. Aki a par’é i a hasi un tèst di supla kuné. A resultá ku el a konsumí mas alkohòl ku ta pèrmití pa lei. A detené i a konfiská su reibeweis.

Djadumingu 31 di mei, alrededor di 11.25 or di anochi, a detené un hòmber di inisial E.A.d.l.S.M. di 43 aña di edat riba Kaya Papa Cornes. E sospechoso a pèrdè kòntròl i dal ku su outo den un kashi di koriente riba e kaya menshoná. El a resultá heridá i personal di ambulans a dun’é tratamentu médiko na e sitio mes. Konforme e maneho di ‘botsen is blazen’, a hasi tèst di supla ku e sospechoso i a resultá ku e tabata manehá bou di influensia. A konfiská su reibeweis.

Djasabra 30 di mei, alrededor di 3.10 or di mardugá, a detené un dama di inisial N.J.F.B. di 18 aña di edat riba Kaya Internashonal. Un patruya a mira un skuter sin lus i a duna e shofùr señal pa para pa un kòntròl rutinario. Durante kòntròl, e sospechoso tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta pèrmití pa lei. A konfiská reibeweis di e sospechoso.

Djasabra 30 di mei, alrededor di 12.45 or di mardugá, a detené un dama di inisial L.M.A.S.T. di 22 aña di edat den ‘Centrumgebied’. E sospechoso tabata enbolbí den un aksidente entre dos vehíkulo ku solamente daño material. Konforme e maneho di ‘botsen is blazen’, a hasi tèst di supla ku ámbos shofùr i a resultá ku e sospechoso tabata bou di influensia di alkohòl. A detené i a konfiská su reibeweis. 

Djabièrnè 29 di mei, alrededor di 8.10 or di anochi, a detené un hòmber di inisial J.F.R. di 64 aña di edat riba Kaya Avelino J. (Abechi) Cecilia. Un patruya a konstatá ku e vehíkulo di e sospechoso tabata zeilu riba kaminda i ademas e tabata mustra komportashon sospechoso i peligroso di manehá. Pa e motibu aki a duna e shofùr señal pa para pa un kòntròl. Durante kòntròl, e sospechoso tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta pèrmití pa lei. A konfiská su reibeweis.

KPCN a indiká ku den tur kaso, e prosedimentu di “botsen is blazen” a ser apliká, unda test di supla a konfirmá ku tur e sospechoso tabata bou di influensia di alkohòl. Nan reibeweis a keda konfiská i tur sospechoso a ser transportá pa warda di polis pa proseso adishonal.

Advertisement