Direktorado di Supervishon i Mantenshon di Lei ta bai intensifiká su kontrolnan próksimamente riba vehíkulonan ku ta mal stashoná den sentro di Kralendijk. Ku e kampaña akí, e direktorado ke pèrkurá pa un sentro di siudat mas seif, aksesibel i ordená pa tantu habitante, empresario i tambe bishitantenan.

Tur dia di nobo nos tur por mira outonan ta keda stashoná na un manera robes den sentro di siudat. Ta stashoná outo regularmente riba asera, dilanti di entrada i salida di propiedat di terser, serka di krusada òf riba lugánan reservá pa outo di moveshon limitá. E outonan akí ta kousa situashonnan di peliger i ta krea molèster pa peaton, tráfiko en general i pa e servisionan di emergensia ku tin ku pasa.

E direktorado ta enfatisá ku segun e Ordenansa di Tráfiko Boneiru 2019, ta prohibí pa stashoná outo na un manera robes. Pa esei e kontroladónan lo ta visiblemente presente riba kaya pa tene supervishon i pa aktua kontra kualke infrakshon. E kampaña akí ta parti di e prioridatnan di e maneho di supervishon kaminda tráfiko i stashonamentu korekto tin un atenshon spesial.

Pa digitalisá e proseso, e outonan ku ta mal stashoná por haña un steker di atvertensia riba nan outo. Sin embargo, den kaso di infrakshon grave òf si ta asuntu di un persona ku ta keda ripití e mes un fayo, e kontroladónan tin e outoridat pa imponé un but òf asta laga transportá e vehíkulo ku kran.

Direktorado di Supervishon i Mantenshon di Lei ta hasi un petishon un i tur pa stashoná outo únikamente kaminda esaki ta permití i pa semper tene kuenta ku e otro usuarionan di tráfiko.

Hefe di Departamento di Proyekto i Taskforce a duna di konosé ku un sentro di siudat seif i habitabel ta kuminsá serka nos tur i pa medio di stashoná outo na un manera korekto, huntu nos ta yuda tene Kralendijk seif i aksesibel.

Advertisement