E Mini-Programa di Gobernashon ku a keda aprobá unanimamente dor di Konseho Insular di Boneiru riba 26 di aprel último, ta forma e base di trabou pa e koalishon ku ta konsistí di frakshon UPB, MPB i frakshon Serberie.

E koalishon entre e tres frakshon ta representá mayoría den Konseho Insular i ta responsabel pa gobernashon di Boneiru pa un periodo atministrativo limitá, te ku elekshonnan di mart 2027.

Segun e akuerdo, e programa no ta enfoká riba un periodo di gobernashon kompletu, sino riba un fase transitorio di alrededor di un aña ku ta keda, ku e meta pa restaurá stabilidat atministrativo i enfoká riba nesesidatnan urgente di komunidat.

Den introdukshon di e dokumento, e koalishon ta rekonosé ku e periodo anterior tabata karakterisá pa un nivel haltu di sentralisashon i stagnashon den varios proseso gubernamental. E akuerdo ta señalá ku esaki a resultá den retraso di servisionan vital i problema den ehekushon di desishonnan i administrashon finansiero.

Pa kambia esaki, e koalishon ta proponé un aserkamentu gradual ku ta konsistí di tres paso: restaurá bista general i kapasidat atministrativo, koregí defisiensianan, i despues formulá un perspektiva realístiko pa futuro desaroyo di Boneiru.

E programa ta basá riba prinsipionan di legalidat, proporshonalidat, efisiensia i faktibilidat, ku un enfoke riba resultadonan konkreto pa pueblo.

E koalishon ta enfoká riba un kantidat di prioridat prinsipal, entre otro:

• Fortalesimentu di finansa públiko i supervision finansiero;
• Mehorashon di infrastruktura i seguridat;
• Solushon pa problema di shushi i maneho di lèntfel;
• Fortalesé prosperidat, resiliensia i konsientisashon sosial;
• Aselerá proseso di permitnan i kontrol (VTH);
• Reforsá seguridat di kuminda;
• Fortalesé ordu públiko i seguridat;
• Promové bon gobernashon i transparensia.

Segun e koalishon, e enfoke aki ta nesesario pa restaurá konfiansa den gobièrnu i pa sigurá ku e servisio públiko ta funshoná manera pueblo ta spera.

Advertisement