Korps Politie Caribisch Nederland (KPCN) a realisá dos kòntròl planiá di tráfiko den transkurso di e siman aki, ku a resultá den varios but pa violashonnan di tráfiko i detenshon di un shofùr ku tabata manehá bou di influensia di alkohòl.

Kòntròl di tráfiko riba Kaya Korona

Den oranan di atardi di djamars 16 di yüni, polis, huntu ku aspirantenan di polis i nan guia di práktika, a tene un kòntròl di tráfiko riba Kaya Korona. Durante e akshon, a kontrolá un total di 18 vehíkulo. E kòntròl a dirigí spesialmente riba vehíkulonan ku tabata transportá garoshi. Segun polis, tabata remarkabel ku varios shofùr no tabatin e reibeweis adekuá pa manehá e tipo di kombinashon aki.

Polis a duna un total di sinku but pa e siguiente violashonnan:

• 3 but pa manehá sin reibeweis bálido;
• 2 but pa manehá sin seguro bálido.

KPCN a indiká ku kòntròlnan di tráfiko lo sigui tuma lugá regularmente.

Kòntròl di alkohòl riba Kaya Nikiboko Nort

Den oranan di anochi di djaluna 15 di yüni, polis a tene un kòntròl dirigí riba uso di alkohòl den tráfiko riba Kaya Nikiboko Nort. Durante di e kòntròl, 38 shofùr a keda someté na un tèst di supla pa determiná si nan a konsumí mas alkohòl ku lei ta permití pa manehá. Un di e shofùrnan a risibí un atvertensia despues ku a resultá ku el a konsumí alkohòl, pero no a surpasá e límite legal.

Un segundo shofùr, un hòmber di 53 aña ku inisialnan J.G.F.H., sí a resultá positivo riba un kantidat di alkohòl superior na e límite permití. Polis a detené e hòmber pa sospecho di manehá bou di influensia di alkohòl. Ademas, a imponé un prohibishon temporal pa manehá di kuater ora.

KPCN ta enfatisá ku konsumí alkohòl ku moderashon ta di gran importansia pa tur partisipante den tráfiko. Manehá bou di influensia di alkohòl no solamente ta un delito, sino tambe ta pone na riesgo bida di shofùr, su pasaheronan i otro usuarionan di kaminda.

Polis ta konsehá persona ku tin intenshon di bebe mas ku e kantidat permití pa lei pa organisá transporte alternativo ku antisipashon. Dependiendo di e seriedat di e kaso, konsekuensianan por inkluí un but, un prohibishon temporal pa manehá, konfiskashon di reibeweis, kastigu di prizòn òf un kombinashon di e medidanan aki.

“Kada shofùr den tráfiko ta responsabel pa nan mes, e okupantenan pero tambe sobrá hendenan rondó di dje. Un persona alertá, ta konta pa dos!” segun KPCN.

Advertisement