Entidat Públiko Boneiru a anunsiá ku kampamentu na sitionan públiko lo ta permití solamente durante un periodo limitá ku ta for di 29 di mart te ku 8 di aprel 2026. Outoridatnan ta pone énfasis ku tur sitio di kampamentu mester keda kompletamente limpi i liber pa 8 di aprel.

Pa partisipá, registrashon ta obligatorio via Selibon N.V., ònlain òf na nan ofisina na Kaya Industria 20. E último dia pa registrá ta 27 di mart 2026. Persona ku no a registrá no tin pèrmit pa kampa, i durante e proseso ta obligatorio pa presentá un identifikashon bálido i firma e instrukshonnan.

Un di e punto prinsipal den e reglanan ta e obligashon pa separá sushi. Kampadónan mester klasifiká tur shushi den sinku kategoria: karbon, plèstik, glas, bleki i restu di sushi. Selibon N.V. lo sòru pa rekohé sushi tur dia, miéntras STINAPA i Selibon lo pone bakinan pa fasilitá e proseso. Ademas, a pone ocho baño portátil repartí entre Sorobon, Lac, Donkey Beach i Te Amo Beach.

Di loke ta konstrukshon na playanan, solamente instalashonnan temporal i seif ta pèrmití, sin kousa daño na naturalesa. Ta estriktamente prohibí pa konstruí riba òf kontra strukturanan eksistente riba bich.

Tambe tin lugánan kaminda kampamentu no ta permití, manera Klein Bonaire i e área protehá di Ramsar Sorobon. Na otro bichnan sí ta permití, sempre ku kampadónan ta kumpli ku e reglanan.

Pa mantené trankilidat, mester baha zonido entre 22:00 i 06:00 or, miéntras ku na Sorobon ta kompletamente prohibí pa toka músika. Regla di medio ambiente tambe ta skerpi i no ta pèrmití pa sende karbon direktamente riba santu, snui mata, laga kachó riba bich òf kore vehíkulo riba playa. Durante e periodo aki tin limitashonnan spesífiko riba sierto aktividatnan di peska.

Kontrol lo ta den man di un taskforce ku ta inkluí Entidat Públiko Boneiru, Kuerpo Polisial Hulanda Karibense, Selibon N.V., STINAPA, KMAR i MMHB. Persona ku no ta kumpli ku e reglanan por risibí multa òf wòrdu remové for di e área di kampamentu.

Outoridat ta hasi un yamada na tur kampadó pa respetá e reglanan, pa asina garantisá un periodo di Semana Santa seif, limpi i respetuoso pa medio ambiente i tur usuario di playa.

Advertisement