Papiamentu
Festival Kanto Krioyo 2026 den kategoria hubenil a konosé su ganadó djabièrnè anochi, alrededor di 12’or. E título a bai pa e kantante hubenil Juliandrick Janga ku su komposishon “Zonido dje panchi” ku a keda komponé pa Wesley Sint Jago i Nelson Anthony.
E final a tuma lugá den un ambiente yená ku bon energia i entusiasmo. E kompetensia tabata fuerte, pero Juliandrick a sobresalí ku su interpretashon i konekshon ku públiko. Su triunfo ta marka un paso importante den su desaroyo musikal i un inspirashon pa otro hóbennan ku ke sigui nan soño den músika.
Juliëndra Janga ku ta ruman muhé di Juliendrick a resultá promé finalista i e di dos finalista a resultá di ta Er’Chayon Vlijt.
Juliandrick na e momento aki tin e título di Festival di Tumba hubenil 2026 i tambe awor e título di kanto Krioyo Hubenil 2026. Su kompositor di ámbos kansion, Wesley Sint Jago, a anunsiá riba tarima ku nan ta bai tur ku tin pa konkista e título di Kanto pa Boneiru ku lo ta un hazaña tremendo si nan logra esaki.
Ku e triunfo aki, Juliandrick Janga ta skirbi su nòmber riba lista di ganadónan hubenil di Festival Kanto Krioyo.
Kargando komentarionan...