Gobièrnu Hulandes a tuma desishon pa bai den apelashon kontra e sentensia di Rechtbank Den Haag den e kaso di klima di Boneiru, inisiá pa Greenpeace Nederland. E desishon aki a wòrdu anunsiá den un karta ofisial na Tweede Kamer.

Dia 28 di yanüari 2026, korte a dikta ku e medidanan aktual di Estado Hulandes NO ta sufisiente pa kombatí kambio di klima, partikularmente pa Boneiru. Segun e hues, Hulanda mester tuma pasonan adishonal pa loke ta trata redukshon di CO2 i adaptashon di klima.
 
E Gabinete ta deklará ku e ta tuma e preokupashonnan di residentenan di Hulanda Karibense na serio i ta enfatisá ku ya kaba ta preparando medidanan, manera eskalashon di energia sostenibel i mehorashon di resiliensia di klima den e region. Na mes momento, gobièrnu ta kere ku tin “motibunan legal serio” pa laga Korte di Apelashon na Den Haag revisá e sentensia.
 
Un punto klave ta ku korte tin intenshon di inkluí emishonnan di transporte aéreo i marítimo internashonal den metanan nashonal di klima. Segun e Gabinete, esaki no ta kuadra den akuerdonan internashonal, den kua e sektornan aki ta wòrdu regulá pa medio di organisashonnan separá di Nashonnan Uni. 
 
Aunke un apelashon wòrdu entregá, Estado Hulandes mester implementá e desishon provishonalmente. P’esei Gabinete tin e intenshon di entregá un petishon pa suspendé sierto obligashonnan temporal te ora ku un desishon final sali.

Advertisement