Boneiru tin mas ku 27.000 habitante i, basá riba e kantidat di habitante, e isla ta kai den klase 5 di "Rechtspositiebesluit politieke gezagdragers BES". E lei aki ta regulá salario i kompensashon di outoridatnan polítiko manera gezaghèber, diputado i miembronan di Konseho Insular.

Pa determiná e salario i kompensashonnan di outoridatnan polítiko den e islanan BES, e islanan ta keda klasifiká segun kantidat di habitante:

Advertisement

Klase 1: 0 – 10.000 habitante
Klase 2: 10.001 – 15.000 habitante
Klase 3: 15.001 – 20.000 habitante
Klase 4: 20.001 – 25.000 habitante
Klase 5: 25.001 habitante òf mas

Outoridatnan polítiko no ta un ambtenar. P’esei nan no ta kai bou di lei di ambtenaar BES, sino bou di lei spesífiko pa politieke gezagdragers.

Diputado

Un diputado na Boneiru den klase 5 ta risibí un salario bruto di USD 109.702 pa aña, ku ta igual na aproksimadamente USD 9.142 pa luna. Aparte di e salario, e diputado ta risibí un toelage di 6% pa kubri gastonan di representashon i otro gastonan relashoná ku e funshon. E toelage aki ta sali na aproksimadamente USD 6.582 pa aña, òf mas o ménos USD 549 pa luna. Ademas, e diputado tin derecho riba un bonifikashon di fakansi i un bonifikashon di fin di aña, segun e mesun prinsipionan ku ta apliká pa ambtenarnan den servisio den Karibe Hulandes.

Gezaghèber

Un gezaghèber den klase 5 ta risibí un salario bruto di USD 138.834 pa aña, ku ta representá aproksimadamente USD 11.570 pa luna. Pa kubri gastunan di representashon i otro gastunan ku ta bin ku e funshon, gezaghèber ta risibí un toelage di 10%di e salario. Esaki ta igual na aproksimadamente USD 13.883 pa aña, òf USD 1.157 pa luna. Tambe e gezaghèber tin derecho riba bonifikashon di fakansi i bonifikashon di fin di aña.

Miembronan di Konseho Insular

Miembronan di Konseho Insular ta risibí kompensashon pa nan trabou i kontribushon pa gastunan. Den klase 5, e kompensashon pa trabou ta USD 15.047 pa aña, ku ta mas o ménos USD 1.254 pa luna. Ademas, nan ta risibí un kompensashon pa gastunan di USD 1.850 pa aña, òf aproksimadamente USD 154 pa luna. 

Kompensashon pa komishon

Miembronan di komishon di Konseho Insular por risibí un kompensashon pa asistí reunion. Den klase 5, e suma ta máksimo ta USD 97 pa reunion. Un persona ku ta miembro di Konseho Insular no ta risibí e kompensashon aki si e ta parti di e mesun komishon. Tambe un ambtenar ku a keda nombrá komo miembro di komishon no ta risibí e kompensashon. 

Salario di Ambtenar

Un eilandsecretaris no ta un outoridat polítiko, sino un ambtenar. E ta e ambtenar di mas haltu den Kolegio Ehekutivo i su salario ta keda regulá segun sistema di salario pa ambtenarnan BES. E salario di un eilandsecretaris i tur otro ambtenarnan ta keda determiná segun skal di salario ku ta pertenesé na e funshon, e responsabilidat, peso di trabou i eksperensia di e persona. E funshon di eilandsecretaris ta den skalnan di mas haltu. Na 2024, eilandsecretaris ta den skal 17, ku un salario bruto ku ta varia entre: USD 8.810 te ku USD 9.910 pa luna. E suma eksakto ta dependé di e trede den e skal. 

Pa komparashon, e struktura di nivelnan di ambtenar ta:

Schaal 17 – Eilandsecretaris
USD 8.810 – USD 9.910 bruto pa luna

Schaal 16 – Direktor
USD 8.040 – USD 9.140 bruto pa luna

Schaal 15 – Afdelingshoofd
USD 7.410 – USD 8.360 bruto pa luna

Schaal 14 – Onderafdelingshoofd
USD 6.555 – USD 7.505 bruto pa luna

Schaal 13 – Adviseur C / Portefeuilleadviseur
USD 5.835 – USD 6.685 bruto pa luna

Schaal 12 – Portefeuillesecretaris
USD 5.070 – USD 5.920 bruto pa luna

Schaal 11 – Konsehero di Maneho B
USD 4.390 – USD 5.240 bruto pa luna

Schaal 8 – Officemanager
USD 2.850 – USD 3.360 bruto pa luna

Aparte di e salario mensual, un ambtenar tin derecho riba kondishonnan manera bonifikashon di fakansi (9.33%), bonifikashon di fin di aña (13e maand) i otro benefisionan òf toelagen si nan ta apliká.

Eilandgriffier

Eilandgriffier, ku ta e ambtenar di mas haltu di Konseho Insular, normalmente ta keda remunerá na un nivel igual òf komparabel ku e eilandsecretaris.

Sectoroverleg Caribisch Nederland i Arbeidsvoorwaardenakkoord ABVO - OLB

Sectoroverleg Caribisch Nederland ta e plataforma sentral kaminda gobièrnu i vakbondnan ta diskutí i akordá base di kondishonnan laboral pa ambtenarnan den Karibe Hulandes. Den e overleg aki ta keda tratá asuntonan manera salario, toelagen i otro benefisionan laboral.

E akuerdonan ku ta sali for di Sectoroverleg ta forma e base pa kondishonnan laboral. Openbare lichamen manera Boneiru por sera akuerdonan adishonal den un overleg lokal, segun nesesidatnan di nan propio organisashon.

Pa Boneiru, e akuerdonan lokal ta keda diskutí ku vakbondnan den Decentraal Overleg Bonaire (DOB). Esei ta e proseso kaminda OLB i representantenan di empleado por akordá kondishonnan spesífiko pa empleadonan di e organisashon.

Segun último informashon ku redakshon di Energia TV a risibí, Openbaar Lichaam Bonaire (OLB) na 2024 a drenta den un arbeidsvoorwaardenakkoord ku vakbond ABVO pa e periodo 2024-2026.

E akuerdo lokal aki a drenta na vigor ku retroaktividat for di 1 di yanüari 2024 i ta inkluí kambionan den struktura di salario. E skalanan di salario a keda adaptá, ku un mehoramentu mínimo di USD 300 bruto pa empleadonan.

Tambe Bashi-Premie anual a subi di USD 251 bruto pa USD 500 netto. Empleadonan ku ta na e último trede di nan skal di salario i ku tin un evaluashon positivo por risibí un pago adishonal kada dos aña, e suma a subi di USD 200 pa USD 300 netto.

E akuerdo ta inkluí tambe kambionan den e gratifikashon pa añanan di servisio, ku ta duna derecho na empleadonan ku kumpli 35 òf 45 aña di servisio segun e kondishonnan akordá.

Asina, e Sectoroverleg ta forma e base general, mientras e arbeidsvoorwaardenakkoord lokal di OLB i ABVO ta trata e adaptashonnan spesífiko pa empleadonan di Boneiru.