Diesdos (12) aspirante a kuminsá e luna aki ku nan estudio pa bira funshonario di duana na Douane Caribisch Nederland. Riba 17 di mart, nan a presta huramentu òf hasi promesa, ku kual ofisialmente nan a start ku e formashon di nuebe luna pa funshonario-C.

Ku e grupo nobo aki, Duana Hulanda Karibense ta fortifiká su kapasidat pa supervishon i kontrol na fronteranan di Boneiru, Sint Eustatius i Saba.

E estudio ta tuma lugá na Boneiru i ta konsistí di un kombinashon di teoria i práktika. E programa ta partí den tres módulo prinsipal: entrenamentu profeshonal integral (IBT) i agente outorisá di polis (BAVPOL), un módulo básiko di téknika profeshonal, i un módulo enfoká riba siña i traha basá riba tarea.

Durante e formashon, e aspirantenan ta haña lès den derecho penal i prosedura penal, manera tambe den formulashon di prosèsferbal i aktuashon profeshonal. Tambe tin entrenamentu práktico riba kontròl di violensia, detenshon, defensa propio i uso di arma.

Ademas, e estudio ta inkluí konosementu di legislashon relevante, manera e Lei di Duana i Accijnswet BES i e Belastingwet BES, huntu ku otro leinan relashoná ku seguridat, salubridat, ekonomia i medio ambiente, inkluyendo regulashonnan internashonal manera CITES.

E aspirantenan ta siña tambe tokante proseso di importashon, tarifanan, balor di duana, eksonerashon i maneho di ekipahe di biahero. Banda di esaki, nan ta sigui lès di Hulandes i ta siña traha ku e sistema digital Asycuda World pa registrashon di merkansia.

Si nan kompletá e formashon ku éksito na desèmber 2026, e aspirantenan lo keda nombrá komo funshonario-C di duana. Despues di esaki, lo desplegá nan na Boneiru, Sint Eustatius i Saba pa pone nan konosementu i abilidatnan den práktika.

Advertisement