Curoil Bonaire a finalisá ku éksito e modernisashon di fasilidatnan na Hato Depot, ku meta pa kumpli ku e último eksigensianan di seguridat promé ku e pèrmit temporal (‘hindervergunning’) kaduká riba 1 di aprel 2026.

E kompania a inisiá e trayekto di modernisashon na mart 2025 despues ku a bira kla ku e plan pa muda operashonnan pa un terminal nobo na Airport Zuid lo no kontinuá. En bes di esaki, Curoil Bonaire a opta pa invertí den e fasilidat eksistente na Hato Depot pa kumpli ku tur rekisito den un periodo di un aña.

Den total, a invertí mas ku 6 mion dòler den e proyekto. E trabounan a inkluí adaptashonnan na tankinan pa mihó protekshon ambiental, konstrukshon di fundeshinan nobo, instalashon di sistema eléktriko kompletamente nobo i tambe un sistema moderno di paga kandela. E último sistema a pasa su fase di prueba resientemente ku resultadonan positivo.

Den simannan benidero, Curoil Bonaire lo sigui ku mas tèst pa pone e instalashonnan den uso i organisá training pa personal. Ademas, e kompania a entregá un petishon na Inspectie Leefomgeving en Transport (ILT) pa ekstendé e periodo di grasia te ku 1 di yüli 2026, pa asina finalisá tur proseso i dokumento nesesario.

Curoil Bonaire a indiká ku lo kontinuá ku mas trabou di modernisashon na otro tankinan na Hato Depot. Tambe a ekspresá danki na diferente partner manera OLB, Rijkswaterstaat, ILT, WEB Bonaire, Brandweer Korps Caribisch Nederland i Ruimte en Ontwikkeling Bonaire pa nan kolaborashon.

Segun Curoil Bonaire, e invershon aki ta esensial pa sigui garantisá un suministro di kombustibel sigur i konfiabel pa e komunidat di Boneiru.

Advertisement