Papiamentu
Boneiru awor tin un Lokèt Hurídiko ku ta ofresé konseho i asistensia grátis na habitantenan. E fundashon aki ta sirbi komo un punto di referensia pa esnan ku tin pregunta òf problema di índole legal pero tambe tambe pa mèldu kasonan di diskriminashon.
Segun Suhendra Leon, direktor di e fundashon, e inisiativa tin komo meta pa garantisá ku tur siudadano tin akseso na informashon i sosten hurídiko, sin konsiderá nan situashon finansiero. Tambe Suhendra a splika ku hopi hende no semper sa unda pa bai ora nan tin un problema legal, i ku e lokèt nobo aki lo yuda yena e basha ei.
E Lokèt Hurídiko lo ofresé orientashon riba diferente tema, inkluyendo derechonan laboral, kontratonan, konfliktonan di bibienda i otro asuntu legal. Tin posibilidat pa referí hende na otro instansia spesialisá si esaki ta nesesario.
Mas aleu Shuhendra a enfatisá ku e fundashon ta un paso importante pa fortalesé aksesibilidat di hustisia na Boneiru. E fundashon ke pa tur hende sinti ku nan tin unda pa bai i ku nan derecho ta protehá.
Ku e lansamentu di e Lokèt Hurídiko, Boneiru ta hasi un progreso den garantisá asistensia hurídiko struktural pa su habitantenan, i ta stimulá mas konsientisashon riba derechonan i debernan den komunidat.
Kargando komentarionan...